Տեսլական, ձգտումները, աշխատանքի շրջանակը «Քաղաքապետերի դաշնագիր հանուն կլիմայի և էներգիայի» նախաձեռնության մեկնարկը տրվեց 2015 թ. հոկտեմբերի 15-ին «Քաղաքապետերի դաշնագիր» և «Քաղաքապետերը հանուն հարմարվողականության» նախաձեռնությունների միավորման արարողության արդյունքում, որի ընթացքում հաստատվեց երկարաժամկետ տեսլականը և նոր պարտավորությունները մինչև 2030 թ.:
Այս նախաձեռնությունը սահմանում է թարմացված պարտավորություններ և փոխկապակցված հարցերի լուծմանն ուղղված երկարաժամկետ տեսլական: Մասնավորապես, խոսքը գնում է կլիմայի փոփոխության հետևանքների մեղմման, հարմարվողականության և ապահով, կայուն և բոլորի համար մատչելի էներգիայի մասին:
Նոր տեսլականը բաղկացած է երեք մասից և ներառում է.
- Մեր տարածքների դեկարբոնիզացիայի արագացում, ինչը թույլ կտա պահել գլոբալ տաքացման միջին մակարդակը 2°C-ից ցածր:
- Կլիմայի փոփոխության անխուսափելի ազդեցության նկատմամբ հարմարվողականության պոտենցյալի ընդլայնում այն կերպ, որը կնպաստի մեր տարածքների կայունությանը:
- Էներգաարդյունավետության բարձրացում և վերականգնվող էներգիայի աղբյուրների օգտագործում մեր տարածքներում այնպես, որը կապահովվի անվտանգ, կայուն և ֆինանսապես մատչելի էներգիայի հասանելիություն:
Այս նախաձեռնությունը նաև առաջարկում է նոր «գլոբալ բաժին», որը խրախուսում է ստորագրող կողմերին կիսվել իրենց տեսլականով, արդյունքներով, փորձով և նոու հաուով տեղական և տարածքային իշխանությունների հետ ԵՄ տարածքում և նաև ԵՄ տարածքից դուրս ապակենտրոնացված համագործակցության ձևաչափով և գործընկեր քաղաքների համագործակցությամբ:
Հանձնառություններ
Մինչև 2030 թ. ստորագրող կողմերը պարտավորվում են նվազեցնել ածխածնի արտանետումների ծավալներն իրենց տարածքներում առնվազն 30%-ով և ուժեղացնել դիմադրողականությունը կլիմայի փոփոխության նկատմամբ, ինչպես նաև ակտիվացնել սեփական ջանքերը, որոնք ուղղված են անվտանգ, կայուն և ֆինանսապես մատչելի էներգիայի ընդհանուր հասանելիության ապահովմանը:
Պարտավորությունները գործողությունների վերածելու համար յուրաքանչյուր ստորագրող կողմ պարտավորվում է ներկայացնել Կայուն էներգետիկ զարգացման և կլիմայի պահպանության գործողությունների ծրագիր ավագանու որոշումից և պաշտոնական ստորագրումից հետո երկու տարվա ընթացքում, ներառյալ հարմարվողականության վերաբերյալ պատկերացումների ակտիվացումը սեփական քաղաքականության, ռազմավարության և պլանների տեսքով:
